Die bose kringloop van armoede wanvoeding

Goeie voeding is nie net belangrik vir goeie geestelike en fisiese gesondheid nie maar word ook as een van die vernaamste maniere gesien om die siklus van armoede te verbreek

Daar is talle voordele daaraan verbonde om ʼn voedsame dieet te eet. Dit sluit onder meer in om energie aan jou liggaam te verskaf, gewigsbestuur, beskerming teen chroniese siektes, versterking van die immuunstelsel en om voortydige veroudering te voorkom.

Die gebrek aan goeie voeding het dramatiese gevolge, veral onder kinders. Dit het onder meer ondervoeding en wanvoeding tot gevolg. Ondervoeding lei daartoe dat kinders honger is, ondergewig is en belemmerde groei beleef terwyl wanvoeding tot tekorte aan mikrovoedingstowwe of vetsug kan lei.

Vetsug in kinders is gewoonlik die gevolg van verkeerde eetgewoontes maar daar kan ook mediese en emosionele redes wees. Vetsug in kinders kan op die korttermyn lei tot kardiovaskulêre probleme en infeksies. Op die langtermyn kan dit ook tot diabetes en ander metaboliese afwykings lei. Dit het dikwels ook emosionele en sosiale probleme tot gevolg.

Goeie voeding stel kinders in staat om te groei en te ontwikkel terwyl ondervoeding kinders van hul toekoms en selfs hul lewens kan beroof. Belemmerde groei kan tot gevolg hê dat kinders nooit hul volle potensiaal kan bereik nie aangesien dit hul fisiese groei kan demper en ook kan veroorsaak dat hul brein nie tot sy volle kognitiewe potensiaal ontwikkel nie. 

Care Protect Invest SA glo ’n vol magie voed soveel meer as net ‘n honger kind. ‘n Vol magie beteken iemand sorg, iemand gee om en ek kan soos my maatjies vandag konsentreer in die klas. Die tekort aan mikrovoedingstowwe dra by tot verswakte liggaamsfunksie. Dit verhoed kinders om te kan leer en akademies te kan floreer terwyl volwassenes nie in hul werk kan presteer nie. Belemmerde groei kan tot gevolg hê dat ʼn kind nooit sy of haar volle groeipotensiaal ontwikkel nie en kan tot gevolg hê dat hul voortydig sterf.

Goeie voeding sal tot gevolg hê dat kinders meer fisiese aktiwiteite kan geniet en hul fisieke gesondheid verbeter om hul teen infeksie en siekte te beskerm. Dit sal hul egter ook help om hul geestelike ontwikkelingspotensiaal en opvoedkundige kapasiteit te bereik.

Dit is om die rede dat goeie voeding gesien word as een van die vernaamste maniere om die siklus van armoede te verbreek. Navorsing wys daarop dat mense wat nie goeie voeding inkry nie, nie onkundig is oor wat hulle moet eet nie maar dat dit eerder ʼn kwessie is van toegang tot bekostigbare gesonde kos.

’n Kind se basiese behoeftes is eenvoudig. Liefde, ’n warm bedjie en ’n bordjie kos. By Care Protect Invest skep ons saam met elke bord kos hoop vir ’n kind wat swaarkry. Begrotingsbeperkings het tot gevolg dat mense eerder minder spandeer op die hoeveelheid kos en die kwaliteit van kos wat gekoop word. In die geval word daar eerder kos gekoop wat vullend is as kos wat die nodige voedingstowwe bevat. Die gebrek aan goeie voeding hou volgens navorsing direk verband met swak inkomstepotensiaal en armoede later in die lewe sowel as gedrag en emosionele probleme.